好快又到農曆新年。你知啦，香港人樣樣嘢貪新鮮，衣食住行固然要最新最潮，年尾亦都係傢俬送舊迎新嘅高峰期，睇真啲，有些被棄置嘅家具仲係新簇簇呀，咁浪費，真係睇見都眼冤。

聽吓回收舊家具非牟利團體負責人點講喇，佢話回收嘅舊家具數量一年多過一年，大前年每日回收約四噸，前年每日收咗約五噸，去年已經飆升至每日六噸，都咪話唔誇張。至於市民自行棄置嘅更加不計其數，搞到好多新界地方淪為家具「亂葬崗」。

話時話，如果家具用到又殘又舊，留之無用，就話棄不足惜啫，查實當中不乏有高檔名廠牌子，好多有六、七成新，甚至有啲只係用咗幾日嘅新貨，點解咁新都唔要？因為老婆話「唔鍾意」喎，咁都得！難怪有人話香港人傻錢多，真係一啲都冇講錯o架。

無辦法喇，香港人生活富足，又崇尚過度消費，完全唔識得「珍惜」兩個字點寫，唔少人換家具如換衣服，話換就換，想丟就丟，連回收組織都話睇到麻木晒，過度消費變過度浪費，你話係咪折墮吖。

香港話晒係大都市，市民嘅環保意識應該都有番咁上下，點解居然浪費成性呢？除咗環保意識低落，同港府無所作為，宣傳教育不足有關。正如環保人士話齋，港府喺減少家具議題上「零動作」，回收措施有等於冇，一味將責任卸畀民間組織。非牟利團體每日收過千個柯打，即使有三頭六臂亦難以應付，最後只能滿足一至兩成嘅回收需求，市民迫不得已下只好當垃圾丟啦。

其實，外國一早已將廢棄家具列入收費範圍，市民先向政府買標記，再貼喺家具上至可以棄置，反觀港產官僚翹埋手闊佬懶理，棄置家具完全無王管，你又丟，佢又丟，人人係咁丟。咁搞法，唔好話現有三個堆填區已經接近飽和，再多十個堆填區都唔夠用喇。

講開又講，其實唔止舊家具廢電器係咁丟，減少廚餘方面一樣乏善可陳。嗱，好似港府年前打鑼打鼓推行「惜食香港運動」咁吖，點知又係雷聲大雨點小。淨係食環署轄下七十五個公眾街市，每日棄置嘅剩菜多達十四公噸，仲話「惜食」喎，呃鬼食豆腐咩！

一句講晒，官老爺搞環保當做騷，小市民嘅環保意識點可能提高呀。睇嚟地球先生唔止冇得好番，分分鐘要入ICU等死添呀，叮！