城中鏡：張小龍自踩微信 曲線銷產品
騰訊高級副總裁張小龍，當日帶住成個Team開發出「微信」，但呢位「微信之父」喺微信年度大會上公開話，嫌啲人喺微信嘥太多時間！
張小龍打算開發更加快捷方便嘅新平台。
張小龍話，睇住身邊同事，連開個會食個飯，都每隔兩分鐘，就要睇手機Check微信，一日由朝到晚睇足朋友圈多達三、四十次；叫佢哋將手機擺埋一邊，五分鐘就捱唔住；唔准佢哋睇，佢哋就會手足無措、好焦慮同好焦躁，個個都變晒神經質。
嗱，入正題喇！原來，張小龍話打算喺微信現有嘅「公眾號」同「服務號」基礎上，推出一個新平台「應用號」。新平台有乜特別？簡單講，用戶關注「應用號」，就好似裝咗一個App咁，但「應用號」唔會推送內容，只提供功能性服務，等用戶有需要時搵到佢就得。咁咪唔使嘥大家咁多時間囉。
先自踩，再嚟曲線推銷件新Product，企業家果然係企業家！
