尋日又係六大慈善團體一年一度到立法會,與議員茶敍同參觀嘅日子,百幾位慈善團成員周圍影吓相留念,部分人係第一次嚟立法會參觀,對周圍事物非常好奇。喺佢哋參觀香港立法機關歷史長廊時,見到博愛醫院總理藍王雲仙對舊立法局文件感興趣,話令佢諗起當年中學留學日本嘅情境。

藍王雲仙對歷史長廊嘅舊文件感興趣。

東華主席何超蕸(右)不時都行經立法會一帶,左為副主席王賢誌。

仁愛堂主席史顏景蓮(左)同仁濟副主席嚴徐玉珊,喺立法會之旅合照留倩影。

藍王雲仙憶起奮鬥史

之前已嚟過立法會嘅博愛主席譚姜美珠尋日充當導賞員,帶住第一次嚟嘅總理蕭何元鳳同藍王雲仙參觀。藍王雲仙話香港同好多外國學生都非常留意政治同時事,但根據佢當年喺日本嘅經驗,當地同學普遍對政治冇乜興趣同意見。佢又自爆當年曾遭同學欺凌,認為佢係留學生,就冇資格上台彈琴,將佢推咗落地,令佢日後更加發奮同愛國。

東華三院、仁濟醫院、保良局、仁愛堂同樂善堂尋日亦有參與茶敍。仁愛堂主席史顏景蓮同總理李慧芬、蔡少森、顏明秀等,原來都嚟過立法會好多次。

東華三院主席何超蕸就話自己公司同立法會好近,所以周不時都會經過,加上東華喺添馬公園有間社企餐廳iBakery,佢哋平時有約,都會揀喺呢度進行,幫襯自己人。

同場有樂善堂主席梁紹安、副主席施家殷、東華副主席王賢誌同總理李曠怡及廖偉麟,仲有仁濟主席林煒珊同副主席嚴徐玉珊等,佢哋原本想喺議員平日接受訪問嘅「咪兜」位合照留念,但經職員提醒,先知嗰度只係畀議員專用,唔可以用嚟攞景影相,大家惟有乖乖揀其他位置影過,一樣咁靚。

第一手消息請下載on.cc東網iPhone/iPad/Android/Windows Phone Apps