外號「吳得掂」嘅教育局局長吳克儉喺小三全港性系統評估(TSA)爭議中,被泛民主派、教育界、家長等窮追猛打,最新連建制專業團體都冇面畀,以提出新年度施政報告建議為名,要求政府暫緩TSA至少一年,又批評目前TSA係擺錯重點,令到整件事本末倒置,最終根本幫唔到班學生,變相再摑吳得掂多一巴。

提24建議 倡暫緩至少一年

由全國青聯常委吳傑莊任召集人嘅青年專業聯盟(聯盟),趁新年度施政報告公布前夕,提出二十四項建議,其中聯盟教育界會長、理大專業及持續教育學院資訊科技總監陳繼宇提及TSA爭議,希望政府暫緩TSA至少一年,包括把小六TSA同中三TSA均一併暫緩,又提議教育局成立促進學習評估中心,以跟進評估學校整體運作。

陳繼宇又話一批校長老師普遍都歡迎佢提出嘅理念,又自言好多老師均唔鍾意學校排名一事,認為完全唔排名就最好喎。

話時話,除咗教協等團體一直要求暫停TSA,依家連有建制派背景嘅專業團體都加入戰團,要求教育局暫停TSA,吳得掂被左右夾擊,睇怕有排煩喇!

第一手消息請下載on.cc東網iPhone/iPad/Android/Windows Phone Apps