政壇：搞網絡吸選民 梁美芬惡補潮語
舊年十一月區議會選舉，有四名區議會、立法會「雙料議員」落敗而回，西九新動力主席梁美芬亦險遇上滑鐵盧，喺九龍城黃埔東選區僅以三百票之差，險勝青年新政游蕙禎，之不過佢所屬嘅西九新動力就冇咁好彩，多名資深議員均落選收場，梁美芬尋日同傳媒午宴時，就話已經作出檢討，就係日後要多用網絡，加上努力惡補潮語，似乎下定決心要搞好網絡攻勢救亡。
梁美芬努力惡補潮語，又展示店主贈送的薄紗。
區選期間，有唔少建制派候選人停用社交網絡，梁美芬亦唔例外，佢直言過往對於網絡係「半放棄」，原因之一係網絡多「黃絲」，難以爭取佢哋支持，然而，佢其後發現，原來網上都有唔少人求穩定，為此佢哋亦會改變策略，爭取佢哋支持，包括西九新動力已請咗兩、三個年輕人，專門負責網絡工作，而佢本人都加入學習潮語行列，最近就學識咗「放閃」、「葡萄」等。
此外，佢都關注深水埗俗稱「棚仔」嘅欽州街臨時小販市場，透露早前到現場視察時，獲熱情店主送上薄紗，但佢笑言薄紗太薄，暫未諗到點用好喎。
