CFO淨管數,熟財務就得?No啦。有資格講嘅係永嘉CFO Terence王志強。佢做CFO踏入十年,做過多間中資企業CFO,包括中國動向、碧生源、中國網通,到依家轉搞潮服,可以話見證住CFO角色嘅時代變遷。

王志強

佢話以前CFO好注重財務、會計能力,數底好之餘,仲要兼備埋一定嘅相關專業背景。但到今時今日,上述能力只算係CFO嘅「基本功」。

現時好多CFO兼任Marketing同PR等職能,既要幫手宣傳,又要見投資者同見傳媒,Terence話依家唔少CFO都要參與財務以外嘅事務,基本上「乜都要知」。好似佢自己咁,依家就要負責埋公司E-commerce(電子商務)工作。

聽落,雖然同傳統諗住CFO要孭嘅職責好似「大纜都扯唔埋」,但佢覺得處理呢類工作係件有趣嘅事。仲有就係,佢話自己以前着衫的確有少少土,但佢公司永嘉經營潮服品牌D-MOP同Y-3,佢身為潮服公司CFO,自己衣着都改變咗,要潮啲返工咁話。

喺本地服飾零售股啲CFO當中,好多年資相當、兼且熟悉唔同行業瓣數嘅臥虎藏龍,難怪被稱做公司嘅「靈魂」。

第一手消息請下載on.cc東網iPhone/iPad/Android/Windows Phone Apps