其實各大政黨嘅青年組織主席，一向被視為黨內第二梯隊上位嘅良機，據悉新民黨青年委員會主席喺本月底換屆，基於青委會兩名前任主席，即新任屯門區議員甘文鋒同南區區議員陳家珮都成功喺地區突圍，企穩陣腳，因此今次改選，吸引黨內最少三名靚仔、靚女爭做主席，包括金融分析師洪龍荃、喺投資銀行任職嘅Gigi王政芝同埋海上絲綢之路協會嘅青年機遇委員會副主席王家揚。

王政芝(圖)、洪龍荃同王家揚都有意角逐新民黨青委會主席位置。（資料圖片）

洪龍荃

王家揚

洪龍荃早前接受查詢時話，自己一直都有投放時間喺黨務，如果黨內需要佢，即使唔係做主席，佢都好樂意。有分析指出，王家揚嘅優勢係有份參與黨主席葉劉淑儀有份創辦嘅海上絲綢之路協會嘅工作，至於洪龍荃同Gigi嘅共通點，就係同樣有選舉經驗，雖則齊齊喺約兩個半月前嘅區議會換屆選舉落敗，前者輸少於一百票，後者則輸二百多票，而外界一般估計，最終邊個接任青委會主席，預計都要有心理準備，隨時為該黨於未來嘅選戰披甲上陣。

第一手消息請下載on.cc東網iPhone/iPad/Android/Windows Phone Apps