政壇：反擊KK 阿忠轉戰超選
喺區議會選舉中落敗嘅民協立法會議員KK馮檢基，無法再循俗稱「超級區議會」嘅區議會第二功能界別參選，惟有另謀出路，早前有傳KK有意落戶九龍東或新界西，加上力保超級議席同九龍西老巢，但政治一日都嫌長，最新消息指出，本身循新界西直選當選嘅街工立法會議員「阿忠」梁耀忠，忽然有意轉戰超級議席，似乎係衝住KK所屬嘅民協而嚟，莫非潛台詞係希望KK打消落戶新界西嘅念頭？
一直盤據新界西多時嘅阿忠，忽然放風有意轉戰超級議席，難免令人揣測同KK打算落戶新界西有關，事關民協多名資深區議員角逐連任失敗，當中包括知名度最高嘅KK，令佢無法重演四年前嘅立法會選舉部署，即由佢本人參選超級議席，另找民協兄弟力保九龍西直選老巢。
而因應最新政治形勢，KK早前亦對外放風，正考慮落戶九西以外，如新西、九東等地區直選區別，外界估計佢有可能轉戰新西，底因係民協喺該區有地區樁腳，並非一無所有，由零開始。
稱憂落入建制之手
阿忠接受查詢時，無直接回應此舉係咪同KK嘅動向有關，只稱擔心KK同白鴿黨「AV仁」何俊仁同時失去超級議席入場券，日後大部分超級議席會落入建制手中。佢又話自己一旦出選超級議席，本身喺新西嘅票源就可以留番畀其他泛民，但佢其後疑留有餘地，稱街工本身亦可考慮派人填補佢喺新西嘅空缺。
面對阿忠忽然有意轉戰超級議席，KK透露，阿忠有搵過佢傾轉戰超級議席一事，但強調民協派出四隊參選嘅諗法無變，再三強調民協年輕一代對超級議席好有興趣，勝負唔一定同知名度有關，又認為如果泛民目標係保住二十四席，無理由只討論超級議席，而唔傾地區直選布陣。
