廣告話齋：「講嘢最緊要有牙力，做人最緊要有實力」，港府施政咯喎，當然要牙力同實力兼備喇，否則一味紙上談兵，無法落實，盞嘥氣嘅啫。

係咁嘅，大嶼山發展諮詢委員會公布第一屆工作報告，建議將大嶼山規劃為十四個「多采多姿」嘅康樂及旅遊景點喎。聽吓報告點講吖，欣澳填海後，建議發展為主題式休閒及娛樂區；梅窩就會發展多元化極限戶外活動；大東山引入觀星設施及露營場地，仲會推出水上的士、索道、纜車、觀光巴士及單車徑配合添；至於大小蠔灣將會發展生態旅遊，而貝澳及芝麻灣就會集中發展為水上活動中心等等。

咁仲唔止，報告建議將大嶼山發展為可容納數十萬新增人口嘅新市鎮，提供近三十萬個就業機會，加上以鐵路系統為骨幹，形成一條貫通新界西北到大嶼山嘅鐵路走廊。按照當局嘅發展藍圖，未來嘅大嶼山簡直係香港嘅新心臟、新命脈，聽落已經夠晒吸引。話時話，港珠澳大橋即將落成，機場第三跑道又計劃興建，加上市區可發展土地已經飽和，旅遊景點又無以為繼，發展大嶼山唔止有實際需要，仲係刻不容緩添。

弊就弊在，先生之志大矣，先生能力不足。發展大嶼山必須填海、拆遷，環保團體及地區人士必定反對，而且社會高度政治化，反對派政客必定全力阻撓。好似興建機場第三跑道咁吖，已經有團體入稟司法覆核，何況發展大嶼山規模更大，唔阻力重重至奇。如果港府無力實行，吹到天花亂墜都係冇意義嘅咋。

話時話，發展大嶼山早就唔係新聞，董建華年代已經提出，可惜議而不決，決而不行，接任嘅曾蔭權爵士無心政事，胡混度日，眨吓眼十幾年過去，依然得個吉。現屆政府重彈舊調，係就係諗頭多多，最怕志大才疏，拖拖拉拉，到頭來又係煲冇米粥。唔係潑冷水o架，睇吓家陣嘅大型基建無一不延誤，無一不超支，證明當局做事毫無效率，仲話興建鐵路走廊喎，怕且等到二○四六都未見影咯。

有句西諺係咁講嘅，縱有無限計劃，若不實行，與談天無異。大嶼山發展藍圖的確夠晒漂亮，但究竟做唔做得到，仲要睇過至知。再講吖，近年激進組織自毀「好客之都」金漆招牌，就算港府排除萬難，落實計劃，到時旅客過門不入，得個睇字嘅咋，叮！