好多愛護動物嘅人士尋日參加「SAA人狗同樂百萬行」，宣萱帶同四隻狗狗出席活動，佢話其中三隻狗狗係自己嘅，另一隻係屬於佢哥哥嘅：「因為我阿哥去咗旅行，所以就暫時寄養喺我屋企，我屋企係狗酒店。」佢透露該機構有新計劃，鼓勵大家領養中老年犬隻，並成立基金資助醫療費，佢其中一隻狗亦係喺六歲先被佢領養，佢話：「希望畀到狗狗餘生幾年安樂嘅生活，年輕嘅狗始終係多啲人收養，覺得易啲教，但其實冇分別，我隻狗六歲嚟到我屋企都好快學識去廁所。」宣萱話現有三狗兩貓，高峰期試過養有六隻狗，覺得好難控制：「以前六隻狗成日打交，因佢哋一出世就喺我屋企未捱過，少少事就嘈交，但呢三隻狗都係流浪狗有過經歷，所以好懂得珍惜，相處得好好。但如果有緊急情況，我都可以再養多一隻。」

宣萱自爆屋企係狗酒店。

江美儀怕難兼顧，只會養一隻狗。

江美儀助養已故阿叔愛犬

而江美儀帶同愛犬Teddy嚟，佢話已支持咗呢個活動有六、七年嘞，問佢會唔會多養一隻狗？佢坦言唔會，因怕難以兼顧，佢話佢叔叔原本養咗一隻狗，後來叔叔過世，隻狗冇人收養，於是送咗去SAA，而江美儀會定期捐錢助養嗰隻狗，最後機構創辦人收養咗隻狗，佢笑言：「我之前去拜我阿叔，我同佢講你可以安心，隻狗依家飛黃騰達，做咗上等人，可以坐遊艇。」

第一手消息請下載on.cc東網iPhone/iPad/Android/Windows Phone Apps