政壇：搞搞政：新東鎅票戰 周浩鼎勢危
因公文袋前成員湯家驊辭職而引發嘅立法會新界東補選，將於下月二十八日舉行。公文袋楊岳橋、建仔周浩鼎同獨立區議員「哪吒」方國珊上周已經率先報名，尋日本土民主前線梁天琦同新思維黃成智亦分別舉行記者會同誓師大會，宣布參選。政界人士估計，楊岳橋雖受本土派梁天琦同白鴿黨前成員黃成智夾擊，但新界東始終係泛民票倉，贏面仍較周浩鼎高；反觀周浩鼎只要被哪吒鎅走百分之五嘅選票，就必輸無疑。
黃成智梁天琦夾擊楊岳橋
梁天琦尋日正式宣布參選，佢坦言勝算唔高，但認為和平理性非暴力嘅一套已經無法為香港爭取民主，故以參選宣揚勇武抗爭理念。佢否認同泛民係同路人，所以從無考慮同公文袋黨舉行初選，亦唔同意會鎅走泛民選票。至於主打第三條路嘅黃成智就話，民調反映中間派有四成支持者，加上自己喺新東服務超過三十年，自言勝算好大。
政界中人分析，黃成智同梁天琦參選最大效果只係鎅走楊岳橋約一至一成半成選票，但泛民喺新界東嘅支持率一直超過五成半，故楊岳橋即使被鎅票仍然相當有機會當選。至於周浩鼎同自稱獨立嘅哪吒路線相似，加上方上屆參選立法會時得二萬多票，周浩鼎有機會「鎅死」，加上佢未得所有建制支持，亦成為佢一大隱憂。新界鄉議局副主席張學明尋日就話，要等十九號開會先決定支唔支持周浩鼎出選，暫時未有立場咁話。
