有人話，香港公務員係天下間最筍嘅工，真係冇講錯。在職期間固然可以偷雞蛇王，甚至上下其手搵公帑着數，退休後就算東窗事發，亦一樣可以甩身，問你服未。

冇錯，講緊嘅咪就係前發展局局長麥齊光囉。佢一二年重返官場擔任問責局長，被踢爆與路政署前助理署長曾景文二十多年前互租單位，涉嫌詐騙五十七萬元租金津貼，事件唔止令佢上任十二日即被迫辭職，成為香港史上「最短命」局長，兩人更被告上法庭，被裁定串謀詐騙罪成，分別被判監八個月，緩刑兩年。兩人不服上訴，上訴庭維持原判，直到尋日至獲終審法院裁定得直，撤銷定罪及判刑。麥齊光話，事件雨過天青，終可將纏繞三年多嘅官司放下喎。

即係咁，隨着終院一錘定音，呢宗轟動全港嘅騙津案亦告一段落，但爭議係咪就此結束呢？當然唔係喇。正如有人質疑，公務員互租單位嘅做法唔正當，法庭裁定兩人無罪，為社會帶來負面影響。所以話，公道自在人心，終審嘅判決顯然無法堵住悠悠眾口。

始終都係嗰句，王子犯法，與庶民同罪。公務員涉嫌以互租單位申請租津係昔日官場普遍現象，而麥齊光被翻舊帳擺明亦係政治鬥爭嘅犧牲品，不過咁喎，無論係乜嘢原因，咁嘅做法已引起極大爭議，亦有「搵納稅人笨」嘅嫌疑。好簡單，原訟庭同上訴庭都裁定麥齊光二人有罪，證明連法律界都存在嚴重分歧，今次案件雖然畫上句號，但有關爭議絕對唔會就此消失。

最令人擔心嘅係，現時公務員系統裏面仲有冇類似情況呢？你知喇，公務員騙取公帑嘅個案層出不窮，加上港府監管粗疏，呃租津已經成為最常見嘅官場醜聞。港府如果唔睇緊啲，堵塞漏洞，隨時又爆出更多醜聞嘅咋。

講開又講，近年終審法院嘅不少判決都引起極大爭議，甚至導致難以預計嘅社會後果。好似至今困擾香港社會嘅「雙非」問題，以及愈演愈烈嘅中港矛盾，歸根究柢咪就係源於當年終審法院對莊豐源案嘅判決囉。終院今次判決對當事人係「雨過天青」，對香港法治就未必嘞。

正所謂，國有國法，家有家規，公務員應該有公務員嘅守則，唔可以行差踏錯，更加唔可以「法不責眾」為理由放生，否則，港府冇規冇矩，又點可能令市民信服呢？叮!