城中鏡：與眾童樂
本港有唔少嘅玩具愛好者，而玩具業界亦有聲音，希望成立一個永久嘅玩具博物館，但講咗幾年，一直只聞樓梯響，唔知幾時至有得睇呢？雖然永久玩具博物館十畫都未有一撇，但工業總會顧問兼已退休玩具界老行尊楊子江就透露，業界會喺一七年初，率先同香港歷史博物館合辦一個本地玩具歷史展，與公眾一同重拾童真。
顏吳餘英（右）同楊子江分別獲傑出成就獎及傑出貢獻獎。
顏明秀（左）細個做白老鼠試玩新玩具，右為玩具廠商會理事張靄妮。
湯誠正（左）同張光銘冀收集懷舊玩具放博物館，供公眾回憶。
顏明秀兒時專試新玩具
香港玩具協會與香港玩具廠商會早前舉辦玩具業周年晚會暨傑出成就獎頒獎典禮，美昌集團副總裁顏吳餘英同楊子江分別獲頒傑出成就獎及傑出貢獻獎。楊子江話玩具係見證每一代人成長嘅集體回憶，其實幾年前已開始爭取建立一個屬於香港人嘅永久玩具博物館，但因為估計最少需要約二萬呎地方，目前仍在尋覓合適場地。
講起以前好多玩具都係自己製作，顏太就話唔止玩具，佢中學時連件校服都係自己一手縫製出嚟，通常用一、兩日放學時間就可以完成，着上身後相當有成功感，縫完校服，仲可以順便縫多幾個豆袋仔攞嚟拋。
當晚出席嘅仲有工總主席鄭文聰同副主席嚴志明、玩具協會主席湯誠正、執委丁天立同林凱章等。活動籌委會主席顏明秀話由於屋企經營玩具廠，佢細個嘅職責就係做「白老鼠」，凡生產新玩具，佢都要砌一次，說明書就係根據佢點砌而寫出嚟。至於香港玩具廠商會會長張光銘細個就比較調皮，會捉「金絲貓」嚟玩，唔知有冇被老師發現呢？
