SUN揭秘：海味舖太子爺 科技救祖業
「你有冇Follow呢嗰facebook Page呀？好多人like喎！」海味舖第四代太子爺李漢興Albert，為老店開設facebook專頁，密密更新，教網民分辨食材優劣之餘，教埋你煲湯煮餸。近三年專頁累積超過四萬個like，成為同業之冠。Albert利用過去市場行銷經驗，透過網絡科技，希望改變年輕一輩的想法，別再誤會海味「貴價兼難搞」，藉此增加客源之外，更想讓更多人認識海味文化。
海味舖接班人Albert，利用新科技重新定義形象刻板的海味業。（甘偉倫攝）
專頁不時上載片段，教導顧客如何浸發海味。
「用社交平台可以接觸唔同年齡層，想畀佢哋知道海味舖賣嘅嘢無想像中咁難處理」
「我覆埋個E-mail就做得訪問，好快！」70後的Albert坐在電腦前，一身輕便服飾，架上時尚的黑框眼鏡，很難聯想他是裝潢古舊、位於上環的同昌海味店接班人。「太爺一九一五年喺廣州起家，後來阿爺、大伯同阿爸嚟香港定居，開咗呢間海味店。」太子爺年少時沒想過繼承家業，直至近年才正式打理祖業。「一三年開咗呢個facebook Page，正式全職打理係舊年年初，無諗過反應咁好」。
拒擺「改革」高姿態
煮婦最重視「平靚正」，加上潮流興養生，「我哋會喺網上寫文，甚至拍片教佢哋點揀靚嘢，每種食材有咩功效，又會教佢哋點浸、點煮」。Albert發現，很多人誤會海味「海鮮價」，「一分錢一分貨，如果佢哋識分就唔怕買海味畀人呃，無咁抗拒」。
「好好嘅post，多啲呢啲資料就正」、「有無得教埋點炆」，網民反應大好，歸功於Albert落力教大家分辨海味優劣，煎炒煮炸炆燉焗都有教。WhatsApp、手機App大行其道，他順勢推出創新的交易玩法，「啲客可以WhatsApp問有無貨同order買幾多，佢哋幾buy呢個方法，覺得好方便」。店內亦有不少客人指會留意網上更新，「有嘢啱買就會嚟」。
開專頁初時無非為搵生意，「八、九十年代最好景，但到千禧年之後受金融海嘯、沙士影響」，Albert形容近年生意仍處於低迷，「好多嘢依家要慢慢發展，急唔嚟」。「窮則變、變則通」，他過去曾任職大公司的市場行銷管理高層，深明行銷策略重要，「用社交平台可以接觸唔同年齡層，想畀佢哋知道海味舖賣嘅嘢未必好貴，同埋無想像中咁難處理」。
在商言商，Albert沒有擺出「改革海味業」的高姿態，為祖業引入新科技改進銷售方式只為增加客源，「海味唔一定貴，唔想啲人覺得去海味舖買嘢實畀人呃而唔敢嚟，咁樣我哋先有生意做」。的確，以誠相待，買賣雙方才能互惠互利。Albert坦言，「真正透過社交平台嚟幫襯嘅其實得一成左右」。改變需時，他期望用盡可行方法，令祖業走過時代的低迷期。
