政壇：搞搞政：版權法搵共識 卿姐教精Greg蘇
立法會尋日繼續審議《二○一四年版權（修訂）條例草案》，喺九個小時會議期間，過半係「催魂鐘」傳召議員返回會議廳，而商務及經濟發展局局長Greg蘇錦樑、副局長同政治助理更不時穿梭會議室前廳同宴會廳，「捉」議員入會議廳開會。
社民連梁國雄、新民主同盟范國威、人民力量陳志全同陳偉業等泛民議員，合共二十四次要求點算法定人數，浪費多於四個半小時嘅開會時間。據知，拉布四子早已制訂拉布時間表，確保時刻有人留守會議提出點人數，務求用盡方法阻止會議進行。直至晚上八時，再無議員要求就中止待續議案發言，主席就要求阿Greg作總結發言，並宣布今早會就中止待續作表決。
祝福Greg蘇：願原力與你同在
雖然白鴿黨反對草案，但該黨主席劉慧卿眼見阿Greg全日行嚟行去，佢都趁食飯時主動教路，要求阿Greg喺建制同泛民之間斡旋，搵個雙方都會接受嘅方法，否則財政預算案喺三月提交立會審議，草案就要讓路，到時政府唔單止會放棄草案，分分鐘連阿Greg都會被放棄，下屆政府隨時「無得撈」喇！卿姐臨尾仲向佢留低一句星球大戰嘅名言，「star war may the force be with you（願原力與你同在）」，以表示對佢嘅祝福。
但卿姐一方面好心教路，另一方面有部分泛民議員似乎從中阻撓，有心想整死阿Greg。工黨何秀蘭話計劃喺完成二讀時引用議事規則55條1（a），將草案由現時立會議程抽走，改由專責委員會審議，再待社會有共識後，提交立會審議，擺明用另類方式拉布，阻延審議草案。其實與其花盡心機鑽研議事規則拖延，不如學習卿姐嘅積極做法，尋求共識更加實際，令大家都毋須再虛耗時間。
