政壇：阿毛唔同勇武本土割席
「本土」化現象不斷冒起，立法會議員范國威同「阿毛」毛孟靜喺三年前成立「香港本土」，佢哋尋日召開記者會，講到「本土」一詞經常被抹黑，將「本土」同「暴力、仇外、故步自封」扯上關係。佢哋又重提喺舊年初嘅光復行動中並無「踢篋」嘅行為，只有「拖篋」；又認為被稱為「勇武本土派」嘅「踢篋」行為，會讓市民將行動嘅目的聚焦喺肢體衝突上。
但被問到係咪要同「勇武本土派」劃清界線時，阿毛就回應話毋須跟「勇武本土派」割席，但重申兩派係有分別嘅，又話雙方各有唔同崗位，唔需要特別合作。既然反對呢啲「踢篋」行為，點解又唔劃清界線呢？唔通驚咗啲「勇武本土派」？此外，二人又將官員「拖落水」，引用官員近年來嘅「本土」言論嚟證明「本土」意識喺香港逐漸成型，認為「本土」意識可推動香港變好。
