政壇：梁君彥請食燒豬 為做大主席鋪路
尋日係立法會新年後第一次復會，內務委員會主席Andrew梁君彥忽然請議員同秘書處職員等食燒豬，話因為新一年開始，過往都有慣例，所以請大家食吓嘢喎。佢仲透露兩隻燒豬，每隻成三十斤重，使咗差唔多六千元，真係闊佬。早前有傳Andrew或密謀想做下屆立會主席，唔知今次係咪燒豬打人牙骹軟，趁機會搞好關係，為做大主席鋪路呢？
梁君彥（左三）聯同黨友及陳維安（右三）切燒豬。
Andrew就話食燒豬嘅原因係因為立會早前避過一劫，因為上月立會大樓議員入口側門同兒童畫廊之間嘅地盤有個簷篷傾斜，好彩當時冇人受傷。咁早前立會門外有垃圾桶爆炸，幸好無人受傷，唔知又使唔使為此事食燒豬呢？
立會秘書長陳維安被問到涉事簷篷同立會連接中信大廈天橋工程嘅進展時話，上月簷篷事故對天橋工程有些少影響，但預計本月底會完工，立會之後會增設路標指示同保安等設施，料需時三星期，換言之，天橋最快農曆新年後就可以啟用喇！
