政壇：橄欖論恐襲抽水 「自己嘅方法」來港
銅鑼灣書店多名股東同員工相繼離奇失蹤，引起廣泛關注，其中報稱一周前喺香港失蹤嘅書店股東李波，早前曾寫信畀書店員工，指用咗「自己的方式」返回內地。尋日立法會大會其中一條口頭質詢，係有關恐怖襲擊，建仔嘅「橄欖」陳鑑林乘機抽水，話如果有恐怖分子好似一般公民咁用「自己嘅方法」出入香港，港府可以點樣防範佢哋發動恐襲。
陳鑑林（資料圖片）
橄欖話恐怖襲擊防不勝防，恐怖分子會透過唔同口岸同證件出入境犯事。佢又舉例指最近就有市民用自己嘅方法離開香港，當然亦會用自己嘅方法返回香港，因此關注當局點樣防範恐怖分子進入香港發動恐襲，以及會否喺管制方面加強人手。不過，保安局局長黎棟國似乎意會唔到對方抽水，仲好認真咁回答。佢話現時出入境檢查嘅準確性同精密程度與時並進，入境處亦會提高警覺，通過同其他執法機關嘅情報搜集，留意有可疑嘅人。
