政壇：容海恩話似吳綺莉多啲
呢排經常同新民黨主席葉劉淑儀行孖咇、盛傳係該黨參選立法會新界東「秘密武器」嘅海上絲綢之路協會青年機遇委員會副主席Eunice容海恩，本身係大律師加上短髮，氣質清純，被指似台灣女星桂綸鎂而被冠稱為「法律界桂綸鎂」。不過，Eunice笑稱行內從來冇人話佢似桂綸鎂，反而早年被指似亞姐冠軍吳綺莉，甚至港姐冠軍袁詠儀。
容海恩（左）同葉劉淑儀拍住上搞青年事務。
從側面近睇嘅Eunice，五官同髮型的確同吳綺莉有幾分相似，但其實佢唔止「得個樣」，仲百足咁多爪，除咗鍾意唱歌，仲識吹小號同彈鋼琴，公餘除咗參加樂團練習，最近仲走咗去夾Band。Eunice話後生嗰陣去加拿大留學，主修電腦科學，所以寫網站、玩新媒體通通冇問題，唔怪得加入青年機遇委員會，同葉劉拍住上喇！
講番Eunice「揸莊」嘅青年機遇委員會，三月底佢會親自率領大學生到福建泉州交流，亦會為本地大學生提供一百個暑期實習職位，唔少都係知名企業，工作地點更遍及東南亞甚至東歐捷克，仲包埋食宿、機票添！
