政壇：梁志祥選新西危危乎

新民黨走票 稱未損合作

其實梁志祥喺今屆區議會可謂接連失利，雖然保得住天耀選區議席，但只係險勝對手一百六十一票，情況都相當吃緊。忙完區議會選舉，之後又忙於應付選舉正、副主席，最終喺全體鄉事「歸隊」、再加上泛民主派、富貴黨同個別新民黨議員支持對手嘅情況下，以十八票對二十二票落敗。

問到會唔會因為失落區議會主席，而影響嚟緊嘅立法會選舉，梁志祥承認唔多唔少都會對建制派造成影響，現時除咗積極搵地區樁腳，仲要將地區服務範圍擴闊，即係要衝出元朗以外嘅地區服務。睇嚟似係亡羊補牢，希望為時未晚。

對於失落區議會主席寶座，事隔一日，梁志祥似乎已經平復心情，仲話做咗八年主席，唔會眷戀呢一個位置。佢仲話由於未來四年元朗有唔少發展項目，佢角逐連任，只係想延續番之前嘅工作，由於佢自己無土地利益衝突，所以處理問題時會公正啲。咁講，唔知係咪暗寸有人可能喺相關議題上唔能夠持平呢？

對於新民黨走票，無支持佢做區議會主席，梁志祥話該黨主席葉劉淑儀事後都有同佢講起，但強調呢次事件唔會影響日後雙方嘅合作；又話唔會怪鄉事派喎，真係咁大方？