中國傳統講究意頭，古人逢年過節都鍾意喺門牆貼上紅紙，呢個就係「開門紅」嘅由來。尋日股市開鑼，未見開門紅不特止，反而收市大跌近六百點，創二十一年來最差紀錄。股市落筆打三更，認真唔老利，睇怕香港今年想有好日子過都幾難。

其實唔使講到咁遠，淨係睇吓啱啱煞科嘅工展會就夠嘞。雖然主辦方聲稱營業額同舊年相若，但大家呢幾日如果有去現場睇過，就會發現以往人山人海嘅盛況早就不再，部分參展商更加大吐苦水，話消費力強嘅內地豪客較往年少，加上市民趁港元強勢外出旅遊，雙重夾擊下，生意額較舊年大跌四成，係十年來最差。尋日公布工展小姐選舉結果，吸引唔少人流，只係叫做攞番個尾彩咁解咋。

一葉落而知天下秋。年近歲晚，市民忙於辦年貨，應該有番咁上下購物意欲，加上工展會主打家居用品同食品，照計點都冇得輸，家陣竟然只係平手離場，成個市有幾差，相信唔使多講喇啩。

當然啦，工展會生意不似預期，只係整體消費市道萎縮嘅一個縮影啫。以啱啱過去嘅聖誕檔期為例，冬日美食節冷冷清清，有參展商蝕本離場，聲稱出年唔會再玩；蘭桂坊食肆門可羅雀，出現大量吉枱，餐飲業營業額更加錄得回歸後首次下跌添。

再睇埋新鮮滾熱辣嘅經濟數據，就知道形勢真係不容樂觀。舊年十一月嘅零售業總銷貨價值較前年同期下跌百分之七點八，其中重災區嘅珠寶首飾、鐘錶及名貴禮品更加插水兩成。之前有人預計農曆年後零售業會掀起結業裁員潮，唔通真係好嘅唔靈醜嘅靈？

大家有眼見，美國進入加息周期，香港遲早跟隨，除咗樓市面對下調壓力，亦進一步削弱本港競爭力，特別係旅遊業更加係首當其衝，訪港旅客跌跌不休，連帶拖累埋酒店、飲食等行業。早排有僱主組織指今年企業請人意欲淡薄，有啲甚至會凍薪，就係一個明顯嘅警號。經濟前景不明咯喎，消費信心自然疲弱，正如老人家教落，親生仔不如近身錢，市民個荷包撳到實一實，零售業有運行至奇喇。

咪話太一叮唔提醒，零售業僱用大量基層市民，關係千千萬萬家庭生計，一旦出現裁員潮，隨時引發社會不穩，唔該官老爺戙高床板諗計應對，唔好又出事至補鑊呀，叮！