城中鏡：雷怡暉勁錫領養弟
九巴後人雷怡暉（Amanda）的弟弟，除了雷智恒和雷永晃外，原來仲有三弟—雷袁駿（駿駿），不過，駿駿喺五歲時，由Amanda媽媽Marie從孤兒院收養回來，自小患上大腦麻痹嘅駿駿說話不清，不良於行，不過，Amanda一家嘅包容與愛，就令佢有一個完全唔同嘅人生。
雷怡暉隔日便會去探望弟弟，姊弟感情極佳。
雷家的生日派對，前中為雷袁駿，後左一雷永晃，後中為媽媽Marie，右一為爸爸雷普照。
Amanda一邊翻看舊照片，一邊話：「媽咪未結婚前係一位醫生，聽到電台招募義工，便自薦做義工，媽咪年年都攞義工獎，就喺長沙灣一間孤兒院認識咗駿駿，嗰陣我喺九巴返工，公司喺附近，媽咪好鼓勵我去做義工，我差不多日日放工就去探啲小朋友，駿駿由三歲住喺孤兒院，媽咪得到爸爸支持，決定收養佢，當時佢五歲。」就係咁，駿駿從此多咗屋企人，雖然行動不便，但雷父為佢設計咗一部有支架嘅單車，家中又加建扶手，加闊通道，方便輪椅出入，又添置咗電腦，每年更會帶駿駿返澳洲悉尼和黃金海岸嘅家度假。
講起呢個弟弟，Amanda話：「雖然佢只有十幾歲智商，但佢識得英語、廣東話和國語。」Amanda又指領養係好大承諾，見到駿駿開心，佢亦學習到唔理其他人目光，其實幫到嘅係自己。
