城中鏡：工展小姐落淚 場面感性過電視選美
工展會尋日煞科兼公布「攤位設計大獎」同「工展小姐選舉」結果，後者由威馬企業嘅代表黎雪瑩大熱勝出，亞軍同季軍分別為來自和興隆潮州花生糖嘅張翠茵同來自昇鋒國際嘅馮凱懿。黎雪瑩喺賽後會見傳媒時感動到不停落淚，場面仲感性過好多由電視台舉辦嘅選美活動。
今屆工展小姐三甲，左起季軍馮凱懿、冠軍黎雪瑩及亞軍張翠茵。
羅程剛表示參加類似比賽，可以提升員工歸屬感。
蔡嘉軒（右）透露公司多次贏出工展小姐嘅秘訣，左為戴澤良。
點解話黎雪瑩係大熱門呢？除咗因為一個靚字，原來威馬企業過往亦出過唔少工展小姐，唔通佢哋公司特別盛產靚女？
智囊團度橋打氣
威馬企業嘅董事總經理蔡嘉軒就透露，佢哋公司十幾年前已經開始派出員工參加工展小姐選舉，公司同事亦都相當重視呢一個活動。好似今年咁，佢哋就特登組咗一個智囊團，為黎雪瑩出謀獻策同打氣，包括一齊度橋商量表演咩項目。而尋日一選完工展小姐，佢哋就立即一齊食飯慶祝，之後會再搞番場慶功晚宴添！
同場仲有香港中華廠商聯合會青委名譽副主席羅程剛，佢表示，自己公司主打海外客，所以甚少參展同埋參賽，但係睇完尋日咁開心兼感人嘅場面，將來佢都會諗吓派人參賽，因為除咗可以提升公司形象外，仲會令員工更有歸屬感及團結，同事間話題都會多咗。
廠商會會董符策雄表示，幾年前有同事參選過，雖然攞唔到冠軍，但係就贏過才藝小姐獎，佢笑言十八年後會叫佢個女去參選，原來佢囡囡今年只得四個月大。
