政壇：泛民區會新丁 打呔靠人幫
新一屆區議員已履新，油尖旺區議會尋日舉行首次會議，除選出民建聯葉傲冬及西九新動力黃舒明任正副主席外，仲影咗張大合照留念，不過，首單甩轆事件也因而上演。
仇振輝（右）熱心幫余德寶打呔，余一臉尷尬地笑。
油尖旺區會今年都有一啲新面孔，當中包括年僅二十四歲嘅公民黨新任油尖旺區議員余德寶（Andy），Andy首次出席會議，有嘢唔識都好正常。不過，搞笑嘅係，大家準備影全體議員大合照，並各自梳妝、執靚個樣時，Andy卻疑似連打呔都唔識，最終要由較其年長四十四歲、現年六十八歲嘅油尖旺區議會前主席仇振輝親自出手，只見仇振輝企喺Andy前，幾下手勢就成功打咗靚呔。
Andy事後辯稱，自己其實識得打呔，只係「打得唔靚」，佢跟住承諾，日後一定會多加練習喎。
