政壇：股神發達三寶得個恨字
股神巴菲特係投資界嘅傳奇，好多人都會請教佢「點解你咁有錢？」股神咁多年來，傳授咗好多佢嘅經驗，今次又再贈多三樣，聽股神發達嗰三寶，原來並唔係太難。
巴菲特發達有方，其中一項竟然係基因好、壽命長。（資料圖片）
股神話，第一樣係生於滿地機會嘅美國；第二則係佢嘅遺傳基因好，夠長命，股神今年八十九歲，淨係投資嘅時間都成六十幾年，而佢一向推崇簡單，專注長期投資，及買低成本嘅指數基金，咁長時間當然回報不菲。
第三樣就係複息，意思係你投資賺到嘅利息，再去賺多啲利息返嚟，時間愈長，投資回報就好似雪球咁愈滾愈大。
