政壇：新同盟總幹事 女將登場
新民主同盟畀人嘅感覺係陽剛味較重，估唔到佢哋嘅首任總幹事係由女性出任，佢就係參選荃灣綠楊選區、以不足二百票落敗嘅王珮芝。
新同盟委任王珮芝（前）為首任總幹事。（資料圖片）
呢個消息公布後，網民反應不一，有網民指王珮芝落選就做總幹事，「真係一個都唔嘥」，甚有安慰獎味道，另有網民則形容王係剛過去選舉輸得最唔抵嘅一人，形容對方係新同盟嘅新希望。
事實上，新同盟今次呢個委任都頗有新鮮感，事關佢哋嘅領軍人物係立法會、區議會「雙料議員」范國威，去年十一月區議會換屆選舉，合共派出十六名候選人中，有多達十五人都係男士，唯一嘅女將係首任總幹事嘅王珮芝，可見新同盟都有意留住王珮芝，希望日後有機會東山再起嘞！
