政壇：阿Paul重裝上身 唔驚爆大鑊
三十五公斤嘅裝備有幾重？立法會議員謝偉俊（阿Paul）試完之後話：「真係好重！」十八名立法會保安事務委員會成員尋日去警察總部參觀，警方安排議員了解爆炸品處理課（EOD）嘅工作。EOD即場試爆咗三克、即係只有三張廿蚊紙咁重嘅炸藥，但爆起上嚟都引發「嘭」一聲嘅巨響，嚇到班議員嘩嘩聲。
謝偉俊（箭嘴示）試穿重達三十五公斤嘅EOD防爆裝備，爆大鑊都唔驚。
EOD之後再示範用拆彈機械人「威霸龍」引爆可疑物品，身穿全套防爆裝備嘅人員，之後再上前確認可疑物是否已沒危險性。「遠觀」過後，班議員終有機會同林林總總嘅拆彈裝備近距離接觸，期間EOD人員提到成套防爆裝備有成三十五公斤重，並邀請議員試穿，最後阿Paul「接受挑戰」，喺兩名警員協助之下，將厚重嘅裝備套上，除低後直言「真係好重」。
立法會示威者早前發生垃圾桶爆炸案，但其實今次參觀早喺幾個月前開始安排，同該案無關。議員亦參觀了港島總區控制中心，警方指大部分報警個案都可以喺服務承諾之內到場，只得百分之一點五唔達標，而九九九熱線接獲嘅非緊急求助個案，已由一二年嘅四成七減至去年三成八，反映警方有關唔好濫用九九九服務嘅宣傳教育收效。
