政壇：搞搞政：乳鴿打網戰 立會殺血路
去年區議會選舉後，政界發現網絡戰已成選戰不可或缺嘅一環，民主黨（白鴿黨）繼早年成立創意媒體部主力於facebook發貼闡釋黨內立場，或回應外界質疑，連今年嘅立法會選舉亦可能向網絡勢力靠攏，因為同網民有較多互動嘅中西區區議員許智峰及元朗區議員鄺俊宇（Roy）都有報名參加甄選，兩個乳鴿會唔會就此彈出呢﹖
「區羅柴」冇報名
白鴿一批「乳鴿」敢於網上世界同持不同意見人士開火，網絡戰任務好自然落喺佢哋身上，在老將如劉慧卿、何俊仁及單仲偕退下火線後，均認為屬意料中事，被外界簡稱為「區羅柴」嘅三名白鴿新生代，即區諾軒、羅健熙及柴文瀚又異口同聲冇報名參與甄選程序，變相放棄九月立法會嘅入場券。咁形勢相對明朗化，若九龍東、九龍西直選仍由胡志偉及黃碧雲冧莊出選，港島直選可能變咗抗爭形象鮮明嘅許智峰頂上。
至於四年前一席都冇嘅新界西直選，白鴿黨今次有黨副主席尹兆堅、早前落敗區選嘅陳樹英，以及近年以寫愛情小說殺出一條血路嘅Roy三人報名爭出線，Roy深受唔少文青、少女以至網民支持，會唔會轉戰超級議席同涂謹申聯手開拓新票源，亦係一大亮點。
新東就因劉慧卿退下火線，新任北區區議員林卓廷接棒已係公開秘密，只係佢於黨內人緣一般，未來發展仍有變數。
