政壇：張學明 周浩鼎 同人唔同命
政壇風高浪急，新一屆區議會已經上任，十八區區議會相繼選舉正、副主席，政界又為新界東立會議席補選及年中嘅立法會選舉動作多多。近期，鄉事派同建制大黨民建聯（建仔）嘅內鬥日趨白熱化，結果建仔副主席周浩鼎宣布參選新界東補選，唔獲鄉議局主席劉業強祝福。但尋日大埔區議會選舉，鄉議局副主席兼建仔成員張學明又無風無浪連任，與同屬建仔嘅黃碧嬌勝出任正副主席。今次真係同遮唔同柄，一個搭順風車，一個就冇咁好命嘞。
大埔、離島及油尖旺區議會尋日已選出正、副主席，雖然早前有消息指，鄉事派同泛民有意推翻張學明，依家鄉事派同建仔疑似面左左，張學明會唔會陰溝裏翻船呢﹖結果佢都係無競爭情況下連任。張學明話多得大家承讓，結果亦顯示大埔區議會好團結。雖然佢唔評論鄉議局會否參加選舉，但就否認建仔同鄉事派不和。問到建制派有否幫原居民爭取權益，佢話憑佢做咗立法會八年嘅經驗，睇唔到有咩新界議題會有政黨反對，又強調建制並唔屬於任何政黨或組織。
鄉事派：組黨有需要
連周浩鼎都美化一番，強調佢哋同唔同黨派或組織關係良好，而且有合作空間。不過，有鄉事派人士就話，佢哋普遍反應係不滿建仔，組黨有迫切需要。
鄉事派同建仔嘅關係真係好難講，事關近日有份新界二十七鄉民情報告初稿流出，內容除咗表明有意參選立法會選舉，更暗批往日幫建仔助選，但對方卻鮮有為原居民發聲，甚至喺關鍵時刻背信棄義，真係火藥味十足，後着可能陸續有來。
另外，離島區當然議員周玉堂喺無競爭嘅情況下順利連任，鄉議局前主席劉皇發女婿兼啱啱由委任轉直選嘅余漢坤就新當選副主席。
