港產官僚開口埋口同國際接軌，其實只係大隻講。好似食物安全條例咁吖，全世界規管愈來愈嚴，唯獨港府墨守成規，幾十年如一日，唔怪得問題食品氾濫成災喇。

好似反式脂肪咁吖，美國食品及藥物管理局已將產生反式脂肪嘅主要來源剔出安全名單，限令三年內全面禁用。反觀港府到依家仲係零監管，只要每百克食物含反式脂肪唔超過零點三克，就可以標示為零，根本就係誤導消費者。本報記者巡查市面，發現好多食品含有反式脂肪，其中一款進口朱古力餅乾，每百克含五點幾克反式脂坊，問你怕未。咪以為植物牛油好健康吖，其實一樣含反式脂肪，至於唔少香港人鍾情嘅菠蘿油、奶油多以至炸雞、薯條等等，更加係反式脂肪嘅重災區添。

反式脂肪對人體有咩影響？聽吓醫生點講喇。攝取過量反式脂肪，會增加人體內嘅壞膽固醇，而壞膽固醇喺體內累積容易令血管硬化、收窄甚至栓塞，嚴重嘅甚至會導致腦中風及心臟病。係人都知，中風同心臟病係主要都市殺手，淨係香港每年就奪走幾千條人命，當局對反式脂肪食品唔監唔管，等於搵市民健康較飛。

話時話，港府後知後覺，規管食品安全法例嚴重落後，反式脂肪零監管只係冰山一角咋。早排鉛水風波搞到滿城風雨，揭發本港監管食物重金屬含量嘅法例，原來已經係三十二年前嘅老古董，同國際標準嚴重脫節，其中豬、羊、雞等肉類製品嘅上限，足足比國際食品法典委員會嘅標準寬鬆六十倍，而蔬菜亦寬鬆二十倍，連內地標準都遠遠不如，簡直匪夷所思。

真係諗極都唔明，食安條例啫，又唔係政改方案，照計冇乜爭議，要修改話都冇咁易，點解拖拖拉拉呢？早喺幾年前嘅施政報告就話會參考食品法典委員會嘅食物標準，進行相關檢討工作，點知之後就冇晒下文，連幾時諮詢公眾都冇時間表，擺明玩拖字訣。基因改造食品亦係一樣，愈來愈多研究顯示對人體有害，歐盟、日本、南韓等地早就實行強制性標籤制度，只有香港採取自願性質，結果好多食品商博懵，明明含基因改造成分都唔貼標籤，搞到制度形同虛設。

講起都幾諷刺，港府成日話「民生無小事」，點知淨係食物安全都搞到一鑊泡。食安官僚敷衍塞責，旨意佢哋把關，不如自求多福好過，叮！