香港人一直視買樓為志願,踏入一六年,地產界女強人胡幗英預料香港樓市將變兩極化,「豪宅前景好,始終供應少,好多海外資金流入,人民幣貶值都令內地資金流向香港,故豪宅只會繼續升;至於新界區周邊嘅低價樓供應多,可能影響大啲,或會有5-10%上落。」至於二十年嘅投資樓市心得,佢總括自己都試過睇錯,心得係:「永遠唔會賺到盡,唔好同物業講感情,若物業升值唔好,唔介意放售,唔好太着緊升跌。」但佢放租物業都遇過唔少難題,笑言好租客難求。

胡幗英(右)與女兒Valerie(中)及女兒男友共遊柬埔寨。(受訪者提供)

胡幗英激讚當地嘅景色靚絕。(受訪者提供)

早前胡幗英放低工作,同女兒Valerie及其英國籍男友遊柬埔寨,畀自己放鬆心情玩足六日,此行主要遊暹粒,惟返港當日女兒即疑水土不服,又屙又嘔,雖然係咁,佢哋仍覺得值得一遊,佢話:「暹粒有世界七大奇迹之一既吳哥窟,景色真係好靚,特別Valerie大學讀考古,見到啲九至十世紀建築既廟宇,佢覺得好神奇。」

佢哋參觀咗吳哥窟、塔普倫等多個廟宇,又喺湖上划艇近距離觀看住喺水上屋嘅當地人生活,大開眼界,導遊仲帶佢哋參觀學校同工廠,話唔少外國人都會喺柬埔寨捐錢建水泵同水上診所。而佢參觀完學校後,就決定出錢捐助學校,「見到學校啲課室都係泥地,所以捐錢畀學校鋪地板,希望幫助學生改善學習環境,過兩年後我會再去,到時睇吓捐咗嘅錢係咪真係用咗喺學校,如果係,下次會再捐錢起水泵。」

第一手消息請下載on.cc東網iPhone/iPad/Android/Windows Phone Apps