城中鏡：青年工業家 搬廠降成本 「越」做愈有
唔少廠商近年都四出物色有潛質做生產嘅新落腳點，務求減低成本。早前見到理文造紙首席執行官李文斌，佢話近年唔少公司都選擇於越南設廠，佢哋亦係其中之一，底因係喺當地設廠人工比內地低很多，舉例指內地工人月薪約四千元，越南則平均約一千元。
李文斌（左）旗下公司喺越南開廠，右為太太何芷韻。
吳慧君（右）透露決定喺邊個地方設廠嘅考慮，身旁丈夫全力支持。
彭一邦（右）小時候曾被鐵釘「拮親腳」，旁為其太太。
香港工業總會與青年工業家協會，早排舉辦傑出工業家及香港青年工業家頒獎禮，講起行業新趨勢，唔少廠商都趁機互相交換心得，其中一名得獎者、南旋集團首席營運總監王惠榮，原來同李文斌嘅做法類同，同樣將喺越南投資廠房，佢話當地除咗人工便宜外，稅務政策亦比較吸引其客戶。
但唔係所有類型嘅廠都適合喺當地進行生產，另一名得獎者、潤成紡織總監吳慧君認為，內地工人喺做工方面嘅技術，較其他東南亞國家好同有經驗，產量較大之餘，其周邊配套亦較完善，例如佢哋生產嘅運動服裝，喺內地廠房附近通常會有齊晒其他唔同配件如拉鏈等，相當方便，因此喺邊個地方設廠，都要視乎生產乜嘢物品。
彭一邦難忘地盤釘拮腳
同場嘅得獎者仲有俊和發展集團副主席彭一邦、百麗國際控股副總裁兼港澳區總經理鄧穎思、黛麗斯胸圍製造廠董事總經理黃啟智等人，其中彭一邦憶述，八歲時就跟爸爸落地盤幫手，仲試過畀啲鐵釘拮親腳，但當時可能太細個，唔覺得厭惡或者辛苦，反而仲隨時間習慣咗有關工作添！
