政壇：搞搞政：出「櫃」路坎坷 議辦搵竇難
區議員要喺當區最貼心服務市民，設立議員辦事處看似理所當然，惟部分議員對議辦落腳點都費煞思量，尤其係用貨櫃做辦事處嘅議員就繼續坎坷。
喺四年前已循天盛選區當選區議員嘅陳思靜，多次申請租用舖位作辦事處都被拒，其後喺當區商場旁擺街站一年多，至一三年底開設全港首個貨櫃議辦，據知其貨櫃議辦唔係由廢棄貨櫃改建，而係以鋼鐵支架搭建組合屋。但事隔兩年，佢喺搵固定議辦方面唔止無甚進展，仲面臨新一次大遷徙，據知因應政府嘅「人人暢道通行」計劃，其貨櫃議辦位置將興建升降機，佢喺facebook亦預告新任期首項重大工作，就係搬遷成個議辦。
月租五千元 仲要捱風險
陳思靜憶及貨櫃議辦點滴時慨嘆，曾試過一年多內六個助理先後辭職，共通原因之一係日日喺條街度唔似返工。佢又話貨櫃議辦嘅租金比舖位平，惟單係組合屋每月就花費五千元，加上每季四千元差餉，換言之同租公屋舖位相若，仲要承受打風落雨帶來嘅風險。
至於連任杏花邨選區區議員嘅工聯會何毅淦亦「同病相憐」，佢同樣喺一三年底開設貨櫃議辦，據知面積僅一百五十呎，但租金高達五千元，仲不設洗手間。佢話如果搵到地方搬應可改善環境，惟至今似乎未有進展。
因此佢計劃「一變二」，即喺原有貨櫃議辦增設多一個貨櫃再打通埋增加面積，但有關細節尚待與政府商討。究竟咁做係有人一廂情願，定係闖出一條新出路？就要試過至知嘞！
