近日又有同葉問有關嘅電影上映,財爺「鬍鬚曾」曾俊華最新網誌又借題發揮抽水,大談葉問同佢徒弟李小龍,並指後者係佢偶像,如果自己冇喺八十年代返回香港,或者會喺美國開一家武館,指導當地鍾意中國武術嘅朋友打拳同舞獅。

曾俊華

鬍鬚曾喺網誌中自爆,自己學功夫嘅時間早過劍擊,形容小學時就喜歡「動手動腳」,先後學過白眉派同南螳螂,後來又加入中國拳擊功夫學院,有系統地跟隨鄺鐵夫師傅學習洪拳,一學就十幾年。

佢其後提及自己嘅偶像李小龍,指對方當年係萬人迷,佢嘅言行、打扮都成為男孩模仿對象,自言對方喺武術嘅理解,確實對自己有所啟發。佢又話學功夫嘅人都肯定對牛頓第三定律有「切身體會」,而李小龍亦從中悟出一套哲學,由此令自己聯想到《道德經》中「上善若水」嘅道理,即能夠如水一樣,將原來要硬碰嘅力量化解,甚至變成對自己有利嘅力量喎。

第一手消息請下載on.cc東網iPhone/iPad/Android/Windows Phone Apps