政壇：新思維選高層 熟口熟面
話要走「第三路線」嘅新政黨「新思維」尋日正式成立，舉行首次會員大會選出領導層，其中黨主席為白鴿黨立法會前議員Dick狄志遠、副主席有新民黨前副主席鄭承隆，以及姜炳耀同廖添誠，秘書長為年僅二十四歲嘅理大學生會前會長兼前公文袋成員黃俊瑯，普通黨員方面仲有一位前無綫及港視藝員黃澤鋒，真係好多個「前」字。
前藝員黃澤鋒加盟中間派政黨新思維。
黃澤鋒話同新思維副主席姜炳耀喺兩、三年前認識，對方其後游說佢入黨，佢自覺認同新思維嘅中間路線，於是決定加盟，並會喺本周四嘅新思維成立晚宴上擔任司儀，但未有拉攏其他演藝界朋友入黨。姜炳耀透露，現時仲同幾名現職藝員傾緊入黨，成事後會公布。
學生領袖十居其九都係激進派，但黃俊瑯經過多番轉折後，最終都係認為新思維嘅中間路線啱自己多啲。佢曾經幫過自己喺理大嘅老師、工黨立法會議員張超雄助選，舊年更曾短暫入公文袋，但最後認為該黨路線同佢自己嘅理念有別，加上阿Dick落力游說，就決定轉會，兼且唔排除將來會代表新黨參選。
