政壇：政治聯繫留白 侯志強謀退黨
四百多名區議員上周五履新，區議會網頁上載十八區區議員嘅資料，包括所屬政治聯繫、議員辦事處所在地同聯絡方式等，其中，身兼上水鄉事委員會主席嘅北區區議員侯志強，申報所屬政治聯繫一欄中懸空，冇填上佢所屬嘅富貴黨，唔通悄悄退咗黨？侯志強接受查詢時證實正積極考慮退黨，會就此同富貴黨榮譽主席田北俊商討。其實政圈流傳侯退出富貴黨多時，究竟係因乜嘢事仲十五十六，只有當事人先最清楚嘞！
侯志強於申報區會政治聯繫一欄懸空，令人聯想或已退出富貴黨。（互聯網圖片）
莫錦貴嘅政治聯繫一欄，同其他鄉事派有分別，惹來疑竇。（互聯網圖片）
再睇吓其他區議會網頁，身兼沙田鄉事委員會主席嘅沙田區議員莫錦貴，其申報所屬政治聯繫包括新界鄉議局或經濟民生聯盟，然而其他鄉事派，包括「新界王」鄉議局前主席劉皇發等，大部分都懸空政治聯繫一欄，莫錦貴接受查詢時稱身為鄉議局中人，作出有關申報係理所當然，冇其他特別意思，真係信不信由你。
此外，侯志強提及自己最新動向，包括積極考慮競逐北區區議會主席，佢形容曾就競逐區會主席進行民調，聲稱自己同建仔代表嘅支持度係五成一對四成九，又表明想「鑿個洞偷水飲」，暗示一場主席之爭在所難免。
