政壇：開壇離題 傅振中被熄咪
香港電台節目《城市論壇》尋日討論立法會新界東補選同換屆選舉等議題，但多名講者都講到離晒題，辣埋包括李國章出任港大校委會主席爭議、銅鑼灣書店接連有股東及員工失蹤事件等。期間，保衛香港運動召集人傅振中喺發言中途被「熄咪」，炮轟港台同論壇主持蘇敬恆唔公道，扼殺佢嘅言論自由。
傅振中（左）炮轟論壇主持蘇敬恆（右）因政治立場而將佢「熄咪」。
事緣論壇嘉賓講者白鴿黨主席劉慧卿，首先提及失蹤事件。傅振中其後喺台下發言，批評卿姐離題，又以本港社運人士楊匡年前喺內地被捕做例子，質疑「你哋啲泛民自己做犯法嘢」先「出事」。蘇敬恆隨即指楊匡被捕同今次失蹤事件無關，其後仲強行將傅「熄咪」。
到節目小休時段，傅振中衝上台前同蘇敬恆理論，多名工作人員一擁而上將雙方分隔開，情況一度混亂。但傅喺節目恢復直播前，已自行返回台下，未有影響節目進行。
蘇敬恆事後解釋，覺得傅振中嘅比喻唔恰當，但其後佢又改口，稱係因為傅發言超時先「熄咪」，否認因政治立場而唔畀佢講嘢。
