政壇：周浩鼎出師造勢甩轆
立法會新界東補選聽日開始接受報名，參選人亦陸續現身，建制派協調嘅建仔Holden周浩鼎尋日宣布參選，多個建制派政黨都有撐場，原本應該出現建制派大團結嘅場面，點知富貴黨同新界鄉議局都冇派人站台，建仔真係失威。富貴黨主席Felix鍾國斌仲大爆，原因係建仔遲遲先搵佢哋！
新民黨、工聯會等多個建制政黨同社團共六十多人為Holden站台，但富貴黨同鄉議局就影都冇，加上政界盛傳富貴黨正考慮派東區區議員李鎮強參選，鄉議局有傳或會派上水鄉事委員會主席侯志強出戰，引人揣測佢哋係咪支持Holden。
哪吒參選行第三路線
建仔主席李慧琼就話鄉議局主席Kenneth劉業強原先答應出席，但有急事嚟唔到，亦因溝通緣故，富貴黨重要頭面人物已安排活動，未來會加強溝通，有信心能爭取到佢哋嘅支持。
但Felix出席城市論壇時話，李慧琼上月三十一日忽然搵佢支持Holden，隨後幾日都係假期，覺得安排有欠周詳。而建仔嘅立法會議員鍾樹根就認同時間係急啲，但之前大家有溝通，認為唔需要挑撥呢啲瑣碎嘢，大家都係大人有大量。但據了解，李慧琼都係上月底先搵Kenneth，所以Kenneth安排唔到時間。咁睇落建仔的確冇乜誠意喎。
另外，西貢獨立區議員「哪吒」方國珊亦宣布參選，話將會行泛民同建制以外嘅第三路線。至於獲泛民推薦參選嘅公文袋Alvin楊岳橋，喺造勢大會上有多個泛民政團撐場，同樣撐場嘅佔領常客細黃伯大爆，Alvin能操流利粗口喎。外界一直揣測官仔骨骨嘅Alvin係咪hehe，但其實佢係有女友o架，唔係hehe，不過覺得私事同公事應該分開，所以暫時唔帶女友去公開場合喎。正所謂有圖有真相，Alvin應該交張相出嚟，畀女友一個名分啦！
