今日係元旦，除咗送舊迎新，亦係回顧及展望嘅時候。睇番過去嘅一年，香港紛紛擾擾，永無寧日，而之所以搞成咁，社會泛政治化固然係主要原因，港府施政混亂亦難辭其咎，尤其係部門行政失當，更引起怨聲載道，投訴不絕。

小數怕長計，東方報業集團舊年總共接到近三萬宗投訴個案，大約半數涉及政府部門行政失當或執法不力等問題，包括街市管理不善、屋邨鼠患及聚賭，更有政府部門接獲投訴後「耍太極」等等。好明顯，針對政府部門嘅投訴一直居高不下，證明港產官僚根本冇聽取民意，冇改善施政。

一如既往，食環署例牌高居投訴榜首，達到三千零四十宗，平均每日接近十宗，都咪話唔誇張。咁又難怪嘅，淨係食肆阻街問題就有唔少投訴，食環署一直闊佬懶理，經過本報多次報道之後，雖然一度嚴厲打擊，情況稍有改善，但問題仍然非常嚴重。至於針對公共街市及熟食市場管理問題，更加投訴不絕。係人都知，食環署轄下嘅公共街市及熟食市場空置率一直高企，除咗浪費資源，而且引發唔少問題，例如有啲檔位被濫用，做貨倉嘅有之，做車位嘅亦有之。本報多次踢爆後，問題引起公眾關注，連審計署亦介入調查，批評食環署管理不善。可惜吖，食環署官僚意見接受，態度照舊，至今仍冇任何改善。

當然喇，港產官僚一擔擔，管理不善嘅又點止食環署。好似房屋署咁吖，舊年亦有近二千宗投訴，其中唔少針對屋邨衞生問題，例如鼠患、蝨患等等，房屋署唔踢唔郁，對居民嘅投訴置之不理，經常要等到本報轉介至肯做嘢。

除咗偷懶蛇王之外，港產官僚最擅長嘅就係耍太極。本報曾向地政總署反映塌樹問題，點知該署一味將責任推畀路政署及食環署，直至記者查證後，地政官僚見推無可推、卸無可卸，至死死氣補鑊。

所以話，港府民望低迷唔係冇理由㗎，官僚敷衍塞責，得過且過，搞到民怨四起，民望唔跌至奇吖。立法會議員王國興就講得啱喇，傳媒報道部門行政失當，就好似一面鏡咁，反映唔同部門嘅情況，其實係幫緊政府，部門應該以此為改善服務嘅動力，絕對唔應該推卸責任。

冇錯嘞，香港烏煙瘴氣，行政立法司法各有各亂，如果唔係傳媒發揮第四權作用，市民隨時投訴無門都似，叮！