城中鏡：活化工廈開P 楊釗意不在魚
中華廠商聯合會會長Eddy李秀恒早前喺旗下葵涌活化工廈KC100舉行新年派對，城中各大商會高層包括中華總商會會長楊釗、工業總會主席Daniel鄭文聰、中華出入口商會前會長莊成鑫等人都去歡聚一番。Eddy特登搵專人喺日本築地魚市場訂咗重達百幾磅嘅巨型吞拿魚，即日由日本直送到港，即劏即食，夠晒新鮮。
李秀恒（右二）訂購過百磅吞拿魚宴客，楊釗（左二）、鄭文聰（右一）同莊成鑫齊去開餐。
李秀恒太太（左起）、羅蕙英同羅台秦齊歡聚。
吳國安（左）同廠商會副會長徐炳光戴草帽扮嘢合照。
鄭文聰吳國安談舊情
喺工廠區開派對，確係好特別，難怪楊釗一到場，就喺門口周圍望，又抬頭上下打量工廈，Eddy就指手畫腳同佢講解。睇嚟楊釗對呢座新派工廈嘅興趣實大過條魚喇，因為佢係素食者嘛！Eddy就話佢往年一向喺山頂家中宴客，今年KC100活化啟用後，好多商界朋友都話想嚟參觀，所以索性移師呢度搞派對。
當晚到場嘅政商界人士甚多，廠商會副行政總裁羅蕙英同會董羅台秦都幫手招呼。在場見Daniel同香港電鍍業商會永遠榮譽會長「安哥」吳國安好好傾，皆因兩家人有三代情。安哥話，佢同Daniel嘅爸爸鄭洲相識好耐，因為鄭洲做五金生意，而電鍍同五金息息相關。
雖然依家Daniel轉行做環保，但安哥兒子同Daniel女兒亦係好朋友，呢段跨越三代嘅情誼好難得。Daniel就諗起四十幾年前，佢爸爸到土瓜灣生產力促進局班房學電鍍時，佢負責接爸爸放學嘅情景，笑稱電鍍業商會應該頒個老人獎畀爸爸喎。
