政壇：紅燈照劏房 胡穗珊識租
唔少人見到花街柳巷，都會避之則吉，但新任工黨主席胡穗珊就恰恰相反，佢自爆曾租住時鐘酒店樓上嘅劏房，仲話當時明知樓下係時鐘酒店仍照租，係因為時鐘酒店會為咗「整靚個門面」而裝修樓梯，而且酒店全日二十四小時有職員返工，有乜嘢事可以即刻搵人求救，非常安全咁話，真係眼光獨到。
胡穗珊自大學畢業就開始租住劏房，可以算係劏房專家。
胡穗珊話大學畢業就已經搬離屋企，因為人工唔高，惟有租住劏房，佢形容首間租住劏房係有紅色霓虹燈光射入房間，有如「旺角卡門」；至於最喜歡嘅劏房，係以三千九百元租嘅一房一廳，簡直係「抵到爛」。佢感嘆依家劏房愈來愈貴，以前一百呎房仔，只係要一千九百元，但依家就升到五千元，非常唔合理！
對於選擇劏房，佢亦有獨門心得，話最重要睇防火設施同走火通道，其次要留意電線有無外露，事關命仔緊要呀！佢又話要留意有無業主立案法團，如果不幸出事，都可以追討應有賠償喎。
