政壇：借錢參選 譚國僑慘捱貴息
喺今屆區議會成功翻生嘅民協副主席譚國僑，仲積極拉票希望爭奪深水埗區議會正、副主席位，原來選舉對佢可算係血淚史，要問民協借錢之餘，仲要被起釘，足足十厘息呀！
譚國僑
翻查選舉申報資料發現，譚國僑為參加區選，曾向民協借三萬五千元，利率超過十厘，還款期三個月，即係要收幾千元利息，但民協只係資助咗佢六千多元，睇嚟佢上屆選唔到，都窮得幾慘！相反，之前係雙料議員嘅馮檢基，選舉就唔使問民協借錢，但民協對佢嘅資助亦相對較少，只有約三千元。
至於元朗區議員周永勤，原來請助理出手唔高，其三個助理月薪由六千一百元至八千元，未知係全職定兼職呢？不過，佢請助理食飯就好闊佬，選舉日單日豪花近五千元食快餐燒味，唔知有幾多人一齊食呢？
