政壇：搞搞政：卿姐交棒 棄選立會

卿姐九一年起，已擔任前立法局議員，回歸後亦一直擔任立會議員至今，喺多場選戰中，一直係長勝將軍。根據白鴿黨嘅立會選舉甄選提名名單，卿姐無報名參加，意味佢唔會參加今年立會選舉，而今次棄選，亦代表佢將告別二十幾年議員生涯。

羅健熙未現甄選名單

有意接卿姐棒，挑戰新界東議席嘅「乳鴿」，包括剛當選北區區議員嘅黨總幹事林卓廷、大埔區議員區鎮樺同黨員梁詠恩。新界西方面，有意參加甄選嘅包括元朗區議員鄺俊宇，以及舊年區議會選舉敗選嘅尹兆堅、陳樹英；而該黨司庫袁海文則與黃碧雲一樣報名參加九龍西議席嘅甄選。

原本盛傳該黨副主席兼南區區議員羅健熙會升呢挑戰立會超級議席，但甄選名單就只有本身係超級議員嘅涂謹申、鄺俊宇同中西區區議員「峯鴿」許智峯。而峯鴿更與黨友莊榮輝一樣，報名參加香港島甄選，反而有傳出戰該區嘅柴文瀚就無參加甄選。

對於無報名參加黨內甄選，羅健熙就喺社交網站回應，自稱已經踏入政圈十年，出選立法會並非唯一服務社會的途徑，認為自己只係三十出頭，仲要努力裝備自己。本報之前亦報道過佢有意出任黨主席一職，睇嚟佢真係疊埋心水，為選主席做好準備喎。