政壇：騰雞美華 臨別秋波
有「騰雞美華」之稱嘅民政事務總署署長陳甘美華自○三年坐正後，唔經唔覺已接掌總署十二個年頭，今年年屆六十嘅佢，將正式退休。政府內部尋日流傳陳甘美華嘅告別電郵，而喺臨別前夕，民政事務總署發出區議會主席選舉指引，統一各區投票程序，疑似防止建制派選區會主席「甩轆」，莫非係「騰雞美華」嘅最後代表作？
陳甘美華喺信中話，尋日係佢喺政府最後一個工作天，對於多年嚟加入唔同嘅決策局，為市民服務，佢感到榮幸，又形容有好同事係難得嘅福氣，感謝同事以竭誠服務嘅精神，群策群力、心靈相通嘅默契，為部門完成一個又一個不可能嘅任務，又高興收到同事嘅告別禮物。消息話今日起，佢將展開退休前休假，而接任人選有機會係財經事務及庫務局副秘書長（財經事務）甄美薇或食物及衞生局副秘書長（衞生）謝小華之中「二選一」。
修訂提名期 礙泛民搶灘
新一屆區會今日展開，將陸續舉行首次會議，並選舉正副主席，部分區會建制派議席僅多泛民主派一席，令泛民問鼎主席嘅機會提高。有指，政府中人已多番提示建制派唔可以「甩轆」，令主席位落入泛民手中，而十八區民政事務專員日前亦向各候任區議員發放區議會主席及副主席選舉指引，統一各區投票程序，訂提名期同退選期，以及同票再進行一輪投票嘅規則，以防日後有任何爭拗。
有泛民資深議員話過去區會可謂「各處鄉村各處例」，選舉正副主席冇統一標準，相信今次係諮詢法律意見後作出嘅修訂，有效令區會嘅程序更規範化。
但有泛民議員批評修訂訂明提名期喺開會前一小時，扼殺咗泛民議員臨時「突襲」搶灘嘅機會。消息人士指建制派喺區選失利，有關方面視區會正副主席之爭為建制派嘅「硬任務」，若泛民成功當選主席，建制派嘅罪名將等同政改「甩轆」，所以不容有失。
