城中鏡：馬時亨明年履新兼抱孫
喺明年一月一日出任港鐵主席嘅「肥亨」馬時亨，未上任之前，家中先有喜訊，就係準備明年做外公抱孫喇！話說尋日我哋見到肥亨女婿、願望成真基金主席Kevin劉仲恒，佢話明日除夕會同太太、即肥亨大女馬露明去泰國曼谷Babymoon兼倒數，乜嘢係Babymoon？即係兩夫婦趁小朋友出世之前去一個浪漫旅行，換句話講，馬露明現正懷孕喇！
大女馬露明（右二）佗Ｂ，馬時亨兩公婆（左三及四）笑逐顏開。
Kevin話依家BB約十幾個星期大，一家人知道呢個消息時都非常開心，外父肥亨得知後，仲即刻講定，話個孫將來要陪佢打高爾夫球，認真搞笑。話說Kevin同太太四年前嘅Boxing Day結婚，呢幾年聖誕願望都係快啲抱B，今年終於得償所願，可謂係最佳聖誕兼結婚周年禮物。
由於係第一次生B，Kevin夫婦有好多嘢都覺得好緊張同新奇，Kevin話太太現時食嘢嘅口味開始有變化，忽然對喜愛嘅甜品完全冇晒興趣，又話已經搵定陪月員，但係好嘅陪月員好搶手喎。
