城中鏡：回味舊情懷
早前博愛醫院董事局舉行慈善餐舞會，大玩勵志嘅獅子山下主題，現場用懷舊街景相片打造時光隧道，女士們就着上旗袍同復古服飾，彷彿時光倒流，志在搵番拚搏嘅香港精神。現場仲有龍鬚糖同棉花糖等傳統美食車，博愛副主席彭少衍等董事局成員好落力「拉客」幫襯。原來美食車唔止應景，仲趁機舉行籌款競賽，難怪個個「檔主」瞓晒身搶客，氣氛熱鬧似趁墟喇！
彭少衍（左起）、李柏成、李鋈發同吳錦青四位博愛副主席瞓身推銷傳統懷舊美食。
陳李妮（右）即將接棒做主席，獲母親鼎力支持。
譚姜美珠（中）、林群（右）同藍王雲仙悉心打扮出席慈善餐舞會。
彭少衍賣雞蛋仔勝出
當晚四架傳統美食車分派畀唔同副主席及總理們做檔主。賣龍鬚糖嘅副主席吳錦青話童年回憶中嘅街邊小食已冇咗一大半，好似龍鬚糖咁，去山頂散步先見到有得賣，佢認為呢啲傳統飲食文化應該要保留。經過一輪激鬥，結果由彭少衍做檔主嘅雞蛋仔勝出，賣棉花糖嘅副主席李柏成一樣開心，因為佢係今屆籌委會主席，佢話今年善款進帳情況唔錯。
博愛主席譚姜美珠、候任主席Lily陳李妮、總理林群同藍王雲仙等人都有出席。Lily接棒在即，當晚買咗多張枱請埋家人同老友們歡聚。佢老公都有出席，但保持神秘唔肯出鏡，實行做Lily背後男人。支持Lily嘅，仲有縱橫遊執行董事CN袁振寧，做過博愛總理嘅CN話打算明年重返博愛大家庭，拍住一眾好友齊做善事。
