政壇：游蕙禎 鄺葆賢 區選前酒店過夜

鄺葆賢嘅總選舉開支逾三萬五千元，但所獲的捐贈就有近二萬五千元。喺開支當中，除咗要花約一千元支付黃埔花園管理處，作為管理處代為張貼海報同派發宣傳品嘅手續費，仲同游蕙禎經網上預訂一間位於紅磡區嘅酒店，位置與黃埔區頗接近。

選舉後有訪問 爭取休息

兩人由十一月二十一日，即選舉前一日起，訂咗三日兩夜高級客房，盛惠二千五百多港元，每人攤分一千二百七十元。翻查資料，鄺葆賢報稱家住深水埗，而游蕙禎就住喺旺角，同黃埔距離都唔算太遠，唔通佢哋咁勤力，喺選舉前真喺把握一分一秒去拉票？

青年新政發言人指由於黃埔區交通不便，加上游蕙禎、鄺葆賢喺選舉日之後有晨早訪問，故安排兩晚酒店住宿，畀候選人爭取時間休息，佢哋否認此舉係特別照顧女性候選人，事關油尖旺區嘅兩個候選人黃家俊同趙旭光都有喺選區附近租住酒店。