做咗深水埗麗閣區議員十二年嘅民協立法會議員KK馮檢基，上月區議會選舉中，敗喺工聯會小花陳穎欣手上，就連盤據多年嘅辦事處都要喺下個月前交還房屋署。

KK早幾日返辦事處收拾物品時，黯然話好多事情無法補救，好似辦事處「無咗就係無咗」，將來要凝聚居民，亦相對困難。佢指麗安邨嘅區議員辦事處自十二年前當選開始，一直沿用至今，有唔少感情，而一入門口見到嘅「眾志成城」橫幅，係十二年前入伙街坊所送贈，無奈掛到下月就要拆落嚟，非常可惜。

下月中搞告別會

辦事處內仲擺放咗五千個文件檔案，係KK十二年嚟協助居民處理問題時積累落嚟，一打開文件櫃，佢娓娓道來，如數家珍。佢話部分問題用議員層面好快就可以解決，但好遺憾有部分真係未能圓滿解決，好似一個女士上門求助，希望處理已故丈夫墓碑裂痕兼沉降嘅問題，沒料到反反覆覆處理五年，都係未能達到受助人要求。佢慨嘆先人不得安寧，但佢自稱已盡咗「人事」處理，唔會覺得「唔安樂」，佢話日後仍樂意繼續跟進問題。

佢又話辦事處每日平均會接一百個居民電話，又會有唔同居民親臨求助，相信有唔少居民依依不捨，所以下月中會一連三日舉行告別會同告別展覽，未知到辦事處拉閘嗰刻，佢會唔會忍唔住流下男兒淚呢？

第一手消息請下載on.cc東網iPhone/iPad/Android/Windows Phone Apps