政壇：屯門區會 盲撐發叔連任
新一屆區議會喺明年一月一日開波，十八區區議會隨即選舉區議會正、副主席，現任屯門區議會主席嘅立法會議員「發叔」劉皇發早前因病住院，一直有傳佢會退下火線，唔再競逐連任區議會主席，並由現任副主席、建仔嘅梁健文接棒。不過，我哋問番發叔意願，佢透過助理回覆，話發叔「仲考慮緊」，指距離截止報名日期仲有幾日，「畀佢（發叔）放完假先啦！」唔通屯門區議會換血存暗湧？
我哋問過梁健文，佢話未知發叔意向，但就話假如發叔願意連任，就算下月五日會議選舉主席嗰陣佢未能現身，佢同其他同事都會支持發叔連任。嘩！發叔全程唔使露面都有咁多人支持，區議會對發叔嘅支持都好盲目吓，同支持張「空櫈」連任有乜嘢分別？不過，有該區資深區議員透露，區選後諮詢過發叔意見，指佢無意競逐連任，料由梁健文接任嘅爭議較少，具鄉事背景嘅古漢強就接任副主席。
車公誕求籤 囝囝接手
事實上，發叔近年已經鮮有現身立法會會議，而且蟬聯立會「四大懶蟲」多年，今年中開始傳出佢身體抱恙，先係突然退任新界鄉議局主席，交由兒子劉業強接棒；喺六月立法會表決政改一役，大部分建制派議員更因為要「等埋發叔」集體離場而導致「世紀甩轆」，當時已經盛傳抱病在身嘅發叔由浸信會醫院趕往立法會投票，自此發叔退下火線嘅消息，更係甚囂塵上。
至於有傳發叔年底會出院返屋企過年，發叔助理承認發叔想返屋企抖抖，但拒絕透露係咪已出院。據了解，明年農曆大年初二車公誕會由兒子劉業強，接替發叔到沙田車公廟為香港求籤。
