說話唔可以亂講，嘢更加唔可以亂食，尤其係今時今日，港產官僚監管不嚴，把關不力，食品安全防線形同虛設，市民一個唔小心，隨時病從口入，後果可大可小㗎。

唔係危言聳聽，新加坡最近爆發乙型鏈球菌大規模感染，源頭懷疑來自淡水生魚片，喺超過三百六十幾宗案例中，至少一百五十宗同食咗中式淡水魚生料理有關。咪以為係小事吖，患者輕則上吐下瀉，重則患腦膜炎昏迷，有人甚至要截肢添，搞到當地要即時禁售淡水即食生魚片。

香港有冇咁嘅食品安全危機呢？梗係有喇。本報記者日前去多間食肆睇過，發現唔少粥店有生鯇魚片出售，部分食肆衞生情況惡劣，唔止將生魚肉長時間置於室溫，仲用不明來歷嘅殘舊毛巾包裹魚肉，睇見都令人反胃喇。更得人驚嘅係，有啲食肆呢頭用刀及砧板處理生魚肉，嗰頭隨即用來處理其他食材，隨時爆發交叉感染都似，唔出事算你好彩咋。

正如專科醫生話齋，淡水魚棲息環境比海水魚更易受污染，鯇魚更加屬高風險魚種，有利中華肝吸蟲及海獸胃線蟲等生長，一旦進食未殺死寄生蟲嘅魚生，輕則導致腹瀉劇痛、嘔吐及急性腸胃炎，嚴重嘅更要照胃鏡清除寄生蟲，都咪話唔得人驚。

唔講唔知，原來香港法例一向禁售淡水魚生，《食物業規例》更白紙黑字寫到明，業界向消費者供應中國菜式魚生即屬違法，最高可被判罰款五萬元及監禁六個月。可惜吖，當局一直有法不依，執法不嚴，結果有法例等於冇法例。近年食肆違例個案愈來愈多，而食環署過去三年居然零檢控，你話係咪嘥氣吖。難怪有立法會議員鬧爆當局抽查食肆主動性不足，執法存在明顯漏洞，擺明敷衍塞責。

話時話，港府對食品安全把關不嚴，搞到烏龍百出，都唔係乜嘢新聞咯。近年大陸同台灣黑心食品氾濫成災，香港夾喺中間，自然難以獨善其身，蘇丹紅禽蛋、孔雀石綠魚、三聚氰胺奶製品、黑心坑渠油、塑化劑食品等等，當局邊次唔係反應遲鈍？邊次唔係賊過興兵？港產官僚渾渾噩噩，後知後覺，市民對食品安全又點可能有信心吖。

講到底，求人不如求己，旨意港產官僚保障食品安全，不如自求多福好過。嗱，咪話太一叮唔提醒，嘢千祈千祈唔好亂食吖，叮！